Dekabrniñ 11-ne keçer gecesi Velikiy Novgorod şeerinde ve Rusiyeniñ Smolensk vilâyetiniñ Dorogobuj şeerinde himiyeviy zavodlar dronlarnıñ ücümine oğradı, dep haber ete Rusiye Telegram kanalları ve yerli sakinler.
"Akron" kübre gruppalarınıñ zavodları darbege oğrağan, dep haber etile. Astra Telegram kanalı qayd etkenine köre, zavod arbiy saada qullanılğan ammiaklı selitra yapa.
Velikiy Novgorod sakinleri zavodda patlav ve yanğınlar aqqında haber etti. Astra şaatlarnıñ foto ve videolarını talil etip, patlav olğan yer "Akronnen" bir dep hulâsa çıqardı, amma "zavodda yanğın bu levhalarnen tasdıqlanamay".
Smolensk vilâyetiniñ Dorogobuj rayonında, Astra oquyıcıları ve Supernova+ Ukrayina Telegram kanalı bildirgenine köre, dronlar himiyeviy zavod ve issilik elektrostantsiyasına ücüm etti. Telegram kanalları yazğanına köre, o da ücüm neticesinde zarar kördi.
Rusiye akimiyeti darbeler aqqında bildirmedi.
Aynı vaqıtta, Rusiyeniñ Voronej vilâyetiniñ valisi Aleksandr Güsev Voronejde dron parçaları elektrik hatlarına zarar ketirdi, bu da elektriklerniñ söndürilmesine ve şeerniñ sol qısmında qızdıruv teminatınıñ bozulmasına sebep oldı, dep bildirdi.
Rusiye Mudafaa nazirligi bir qaç regionda, şu cümleden Moskva vilâyetinde urıp tüşürilgen aman-aman 300 Ukrayina uçucısızı aqqında bildirdi.
Azatlıq Radiosınıñ Rus hızmeti haber etkenine köre, Moskva ava limanları işini toqtattı, onlarnen sefer başqa vaqıtqa qaldırıldı, Ermenistan baş naziri Nikol Paşinânnıñ uçağı qonıp olamadı.
Ukrayina bugünki Rusiye darbelerini daa izaatlamadı.
Rusiyeniñ büyük istilâsı başlağan soñ Rusiyede çeşit obyektler ava darbelerine oğray. 2024 ve 2025 seneleri ücüm nişanları cermay zavodları oldı.
Ukrayina Silâlı quvetleri Baş ştabı ücümlerniñ çoqusını tasdıqlap, Ukrayina Mudafaa quvetleri "Rusiye işğalci ordusınıñ küçüni zayıflatmaq, Rusiyeni Ukrayinağa qarşı silâlı istilânı toqtatmağa mecbur etmek içün muntazam sürette tedbirler ala", dep bildirdi.
