İlk qış ayınıñ 8-nde AB-ndeki Qırımtatar diasporasını birleştirgen yañı institut olaraq özüni köstergen Qırım teşkilâtları assambleyasınıñ qurulış qurultayı keçirilgeninden berli üç ay keçti. Qırım teşkilâtları assambleyasınıñ prezidenti Elvis Çolpuh Qırım.Aqiqatqa, keçken üç ay devamında teşkilât öz yüksek potensialını ve inkişaf etmege qabiliyetini numayış etti, dep ayttı.
Cemaatçınıñ malümatına köre, Qırım teşkilâtları assambleyası qurulğan vaqıtta AB beş memleketinden yedi teşkilât ve teşebbüs gruppasını birleştirgen edi, QTA teşkil etilmesi aqqında ilân etilgen soñ daa dört teşkilât qoşulmaq istegenini bildirgen.
"Assambleyanı meydanğa ketirgende maqsadımız, halqara alanda Qırımlılarnıñ (Qırımtatarlarnıñ) menfaatlarını qorçalamaq içün Avropada olğan Qırım cemiyetlerini birleştirmek ve quvetleştirmek edi. Assambleyanıñ aza teşkilâtlarını birleştirgen maqsatlardan biri — Qırımnıñ Rusiye tarafından işğal etilmesini tanımamaq, dezinformatsiya ile küreşmek, Qırımlılarnıñ (Qırımtatarlarnıñ) aqlarını qorçalamaq. Assambleyanıñ üç aylıq faaliyeti vaqtında, bizler Bundestagda ükümran firqalarnıñ temsilcileri ile, Bundestagnıñ insan aqları komiteti ile yüksek seviyede körüşüvlerde iştirak ettik, BMT yan tedbirinde ve çeşit halqara konferentsiyalarda çıqışta bulundıq. Kelecek sene bir sıra büyük leyhalarnı amelge keçirmekni planlaştıramız", — dedi Çolpuh Qırım.Aqiqatqa.
Assambleyanıñ teşkil etilmesine GfbV (Tehqiq etilgen halqlar qoruvı cemiyeti) ve ICATAT (Kavkazşınaslıq, türkşınaslıq ve Tükrkestan araştırmaları institutı) alman teşkilâtları qol tuttılar. Teşkilâtnıñ timsali qızıl lâle ile qırmızı bayraq oldı — Qırımtatar medeniyetiniñ ananeviy süslenmesi, o, deger, yañıdan doğuv ve nesillerniñ devamlılığını timsal ete.